FESTAS
O escritor e xornalista Alberto Avendaño, pregoeiro de San Roque 2024 Alberto Avendaño (Vigo, 1957) será o sucesor de María Foscaldo, “La repunante”, como pregoeiro de San Roque. O escritor e xornalista, afincado en Vilagarcía dende hai uns anos tras regresar de Estados Unidos, onde desenvolveu unha exitosa carreira profesional, sairá ao balcón da casa consistorial o mércores 14 de agosto, ás 20:30 horas. Despois, como vén sendo tradicional, haberá un desfile de asociacións e colectivos que farán unha ofrenda floral ao santo diante da igrexa e, xa pola noite, Guadi Galego protagonizará o primeiro dos grandes concertos (22:30), que se complementará cunha sesión de La Duendeneta na Alameda a partir das 23:30 horas.
27.07.2024. Alberto Avendaño é escritor e periodista cunha vida en dous mundos (Galicia –TVG- e Estados Unidos –The Washington Post—) e en tres idiomas (galego, castelán e inglés). Defínese como un “emigrante retornado” que escolleu Vilagarcía de Arousa para, despois de 30 anos fóra, ofrecerlle á súa familia unha referencia de vida e de cultura. É membro numerario da Academia Norteamericana de la Lengua Española, recibiu os galardóns máis importantes da prensa hispana de Estados Unidos e conta con tres premios Emmy da Academia da TV estadounidense.
Ao longo da súa carreira, Avendaño publicou varios libros de narrativa e poesía, traduciu ao galego a Allan Poe, traballo polo que recibiu un premio internacional. Na TVG realizou e presentou varios programas informativos e magacines e tamén dirixiu dobraxes. En Estados Unidos, onde se licenciou en xornalismo, que se sumaba á seu título de filoloxía en Santiago, creou o semanario “El Tiempo Latino”, co que chegaría a un acordo de colaboración con The Washintong Post. Na súa estadía en USA, Avendaño recibiu diversos premios polos seus traballos en prensa e televisión, sempre en español.
As festas de Vilagarcía, que Avendaño pregoará, arrancarán o mércores 14 e concluirán o domingo 25. Doce días de festa nos que haberá música, humor, folclore, verbenas e circo de rúa, con moita presenza do talento local e galego, e concluirán co sempre esperado festival pirotécnico do Combate Naval, o sábado 24, e o desfile de carrozas, o domingo 25.