CONCELLO
O goberno local transmite as súas condolencias polo pasamento do empresario Manuel Jesús García Rodríguez O goberno local de Vilagarcía expresou o seu pesar polo pasamento do empresario Manuel Jesús García Rodríguez e transmitiu as máis sentidas condolencias á familia, amigos e a todos os traballadores e traballadoras de Thune Eureka, empresa que presidía dende o ano 2003.
31.07.2024.- O alcalde, Alberto Varela, salientou o espírito emprendedor e a valentía de García Rodríguez, “que nos momentos máis duros da firma, cando estivo a piques de desaparecer coa marcha do capital noruegués, se puxo ao fronte do grupo dos 18 empregados que o arriscaron todo por manter a empresa e os postos de traballo do plantel, conseguindo mantela a flote e convertela nunha das industrias máis fortes e con presenza internacional do noso municipio e de Galicia”.
Varela engadiu que “Vilagarcía perde a un visionario e a un emprendedor que apostou pola súa cidade e que nos deixa o mellor exemplo do que debe ser a cultura empresarial e industrial”.