FESTAS
A maquinaria municipal coordina a organización dos actos das Festas de San Roque O Concello de Vilagarcía reuniu esta mañá aos responsables de todos os servizos (internos e externos) implicados na organización e desenvolvemento dos actos das festas patronais de San Roque. Aínda que os festexos propiamente ditos celebraranse do 14 ao 25 de agosto, a longa lista de actividades e actos culturais comeza xa esta fin de semana coa Festa da Ameixa do Carril e remata o 31 de agosto coa Noite das Meigas. Polo tanto, son moitas as actividades a desenvolver e durante as vindeiras semanas, e tamén moitas as necesidades que leva cada unha delas.
07.08.2024.- A concelleira de Cultura, Sonia Outón, foi a encargada de dirixir a reunión na que tamén participou o concelleiro de Medio Ambiente, Diego García, e na que se analizaron as necesidades directas e indirectas de cada acto incluído no programa, e se coordinou a actuación de todos os servizos, de xeito que a maquinaria funcione á perfección para que os vilagarciáns e as persoas que nos visitan estes días poida gozar das festas e da cidade nas mellores condicións.
Ademais dos técnicos e persoal da Concellería de Cultura, na xuntanza participaron os responsables dos servizos municipais de Obras, Electricidade, Medio Ambiente, Xardíns, Comunicación, Policía Local e Emerxencias, ademais dos de Urbaser, a concesionaria dos servizos de limpeza viaria e recollida de lixo.
Estas reunións son un procedemento habitual de traballo no Concello de Vilagarcía e serven para concretar os operativos e loxística de cada acto das festas, tanto no relativo aos medios materiais e humanos, así como ás necesidades colaterais que producen. Labores de montaxe e recollida de escenarios, colocación e retirada de cadeiras, limpeza de rúas e mantemento de zonas verdes, sinalización de cortes de tráfico e limitación de estacionamento, comunicación das medidas e regulación da circulación ou vixilancia en concentracións de xente son só algunhas das labores que levan a cabo os departamentos municipais.
A maiores desta reunión de organización dos festexos, tamén se celebran unha Xunta Local de Seguridade e outra xuntanza para o operativo especial de seguridade do Combate Naval.