VILAGARCIA DE AROUSA

CONCELLO
O Concello acorda a reposición do mosaico de Víctor Rúa nunha zona menos transitada da contorna da Alameda
O Concello de Vilagarcía e Víctor Rúa acordaron colaborar para repoñer e deteriorado mosaico da rúa Valentín Viqueira, obra do artista plástico arousán. Segundo o pactado, Rúa elaborará e remitirá ao Concello o deseño e o orzamento da obra a repoñer e Ravella financiará a súa instalación nun espazo da contorna da Alameda que non rexistre tránsito eventual de vehículos, causa do desgaste da composición orixinal. Deste xeito, a obra estará convenientemente protexida e en mellores condicións para ser admirada polo público.

09.08.2024.- O acordo recolle ademais que o deseño, que pasará a ser de propiedade municipal, debe ter as mesmas dimensións que o mosaico orixinal e, dado que se emprazará nun espazo de tránsito peonil, os materiais para a súa confección non poden esvarar en contacto coa auga co fin de garantir a accesibilidade e evitar riscos.

No que se refire ao espazo que ocupa o actual mosaico- valado dende hai meses para evitar tropezóns e caídas de peóns-, a zona arranxarase mediante a instalación de lousas de pedra granítica tipo país igual á do resto da rúa. Esta intervención, que se adxudicará na Xunta de Goberno Local do próximo luns, ten un custe de 14.728 euros e se levará a cabo tan pronto como se asine o contrato e se subministre o material.

Malia todo, tendo en conta o inminente inicio das festas patronais e dada a multitude de xente que acollerá Vilagarcía estes días e que, de forma especial, transitará polas rúas peonil da Baldosa e a Alameda, zonas de bares e terrazas, o Concello executará unha actuación provisional para garantir a accesibilidade e evitar riscos de caídas. De forma inmediata procederase á retirada dos restos do mosaico actual e nivelarase o firme cubríndoo cunha capa de formigón. Pasadas as festas e recibida a pedra executarase o enlousado definitivo, así como á reposición do mosaico de Víctor Rúa no seu novo emprazamento.

O mosaico de Víctor Rúa instalado no extremo de Valentín Viqueira coa Alameda, foi unha das intervencións plásticas de creadores locais coas que se decorou a rúa cando foi peonalizada en 1994, seguindo o modelo de ornamentación artística iniciado un ano antes na rúa Baldosa. Ao situarse nunha zona de entrada para o paso eventual de vehículos de carga e descarga, a composición sufriu un importante deterioro, perdendo teselas e xerando irregularidades no firme, razón pola cal foi valada hai uns meses para evitar riscos de caídas por parte dos peóns.