CONCELLO
O goberno aproba o proxecto para a humanización da contorna da Praza da Peixería O Concello de Vilagarcía xa dispón do proxecto para a humanización do tramo da avenida da Mariña no que se empraza a Praza da Peixería. A Xunta de Goberno Local vén de aprobar o deseño realizado pola arquitecta vilagarciá Lucía Araújo para continuar devolvendo ao peón as rúas máis céntricas e emblemáticas da cidade. A intervención afectará ao tramo de rúa que vai dende o cruce con Conde Vallellano ao da Praza do Doutor Carús, converténdoo nun paseo peonil con zonas axardinadas e árbores, amable e atractivo para o desfrute das persoas, e que porá en valor o edificio histórico da Peixería e o casco antigo da zona do Castro.
12.08.2024.- Despois da intervención de urbanismo táctico levada acabo hai uns anos para poñer a proba a peonalización nesta zona do centro da vila, o Concello aposta por consolidar a medida cunha intervención máis ambiciosa que cambiará e mellorará considerablemente unha zona que enlaza co Castro e, tamén a medio prazo, coa peonalización de Conde Vallellano. Con isto completarase a humanización do eixo principal de Vilagarcía, dando continuidade ás zonas da Praza de Galicia, Rey Daviña e A Baldosa por un lado, e de Arcebispo Lago, Castelao e Arcebispo Andrade polo outro.
A humanización da rúa na que se sitúa a Praza da Peixería tamén mellorará a accesibilidade a un edificio que ten un uso lúdico e cultural e que, polo tanto, xera un importante fluxo de persoas cando se celebran eventos.
Ademais da intervención en superficie, o proxecto prevé a renovación dos servizos de abastecemento de auga, saneamento e recollida de pluviais, así como a instalación das canalizacións soterradas para os tendidos de electricidade, alumeado público e telecomunicacións.
A redacción do proxecto financiouse cunha subvención da Rede Ágora da Deputación, programa que ten como obxectivo financiar a recuperación de espazos públicos para as persoas. Unha vez aprobado o deseño, o seguinte paso que debe dar o Concello será procurar os fondos necesarios para executar a obra orzada en 478.524,40 euros e un prazo de execución de 6 meses.