VILAGARCIA DE AROUSA

FESTAS
Vilagarcía celebra o día de San Roquiño O Pequeno co sabor “da casa” de Cruceros Manzanares e The Eskarallas
Vilagarcia vive mañá, 15 de agosto, a xornada máis “caseira” das festas patronais. A celebración de San Roquiño O Pequeno no barrio que leva o nome do santo, con procesión e reparto de empanada ao pé da capela, como manda a tradición, e as actuacións dos grupos musicais locais The Eskarallas e Cruceros Manzanares, compoñen o prato forte da axenda do día, que inclúe tamén os pasarrúas dos grupos de gaitas e a animación que pola noite ofrecerán os sempre espectaculares Festicultores co seu peculiar vehículo espacial.

AXENDA DO XOVES 15 AGOSTO

11:00 - Barrio de San Roque
Pasacalles San Roquiño O Pequeno
Grupo de gaitas Os Terribles de Arousa.

11:30 – Barrio de San Roque
Misa de San Roquiño
Cantada pola Coral Cortegada.

12:30 - Barrio de San Roque
Procesión San Roquiño
Acompañada da Banda de Música de Vilagarcía e Os Terribles de Arousa. Ao final haberá repartición de viño e empanada por xentileza do Concello.

12:30 - Rúas da cidade
Pasacalles
Grupo de gaitas A Queimada de Bamio

21:00 - Rúas da cidade
Pasacalles
Cantareiras Bulideiras de Fontecarmoa

21:00 – Praza de Galicia
Son da Casa
Cruceros Manzanares
O proxecto musical da artista vilagarciá Enma Castañeiras, “Cruceros Manzanares”, preséntase coma o primeiro grupo do xénero caspa-pop, coa tentativa de traer ao presente os sons e ritmos dos setenta e oitenta, que tanto nos fan bailar, pero á súa vez permítenos rir con todo o arcaico que arrastramos. Un grupo fresco de verán, divertido e moi bailable, que promete unha chea de cancións de amor, desamor, arrecendo a cloro e a “aftersun”.

22:30 – Praza de Galicia
Son da Casa
The Eskarallas
The Eskarallas nace entre Vilaxoán de Arousa e Santiago de Compostela en agosto de 2020. Julen (voz), Xavi (guitarra rítmica), Gorka (guitarra solista), Santi (baixo) e Fran “Trilli” (batería), distribúense entre Vilaxoán, Compostela, Arzúa e Boiro. A pesar da pandemia, os cinco apañáronse para lanzar o seu primeiro single “De que vas?”, a través de tendas dixitais e redes sociais. A tremenda acollida do público levou á banda para asinar co selo Viuda Negra de Colombia e poder lanzar o seu primeiro álbum de longa duración.

23:30 – Rúas da cidade
Festicultores Troupe
Os auténticos cultivadores de festas, acompañados sempre do seu carro de tecnoloxía punta alieníxena galaica e o seu motocultor tunnig Barreiros, farán divertir a todas as almas errantes. Aseguran que seguen a perder a cordura, e que por iso están en constante involución, empeñados en curar todas as amarguras coa festa máis revolucionaria e divertida, conquistando todas as rúas e prazas coa súa música e humor.