CULTURA
A romaría Folk no Alobre mantén o programa pero as actividades de tarde pasan á Peixeira, polas malas previsións do tempo A Romaría Urbana Folk no Alobre celebrarase mañá, como estaba previsto tras un primeiro aprazamento a causa da chuvia, pero dividirá as actividades en dúas sedes, de novo polas malas previsións meteorolóxicas. Deste xeito, e segundo informou a asociación organizadora, Pesdebarro, o programa da mañá manterase no parque do Castriño e o da tarde trasladarase á praza da Peixería.
28.09.2024. No programa definitivo consta, pois, que a romaría arrancará ás 11:00 horas co espectacular Ritual das Penas do Alobre, cunha visita ao castro e o parque Enrique Valdés Bermejo con Xurxo Souto e o grupo tradicional Os Demos da Petaca. Despois, ás 13:00 horas, comezará a sesión vermú con A Tropa do Trapo e o Contos de Nenas Grandes e Pequenas, con Marta Ortiz e Brais das Hortas. Unha hora despois será o tempo do "xantar demorado", amenizado por grupos tradicionais.
Trala comida, a actividade trasladarase á praza da Peixería. Dende as 16:00 ofrecerase un obradoiro, "Bailar cando os tempos", con Carme Cambo e Chús Caramés. A partir das 17:00 horas, e baixo a cuberta da Peixería, comezarán os concertos, cun cartel no que figuran as Pendareteiras Pesdebarro, a Asociación Cultural Nós de Sobradeo, Bailai Malditos, Tiruleque e Os d´abaixo.
O Folk no Alobre é un evento aberto e gratuíto organizado polo Concello de Vilagarcía e xestionado pola asociación Pesdebarro, coa colaboración de Corticata-Turismo Medioambiental.