CULTURA
A Sinfónica de Galicia estrea mañá a temporada da SFV cun concerto gratuíto patrocinado polo Concello Vilagarcía volve facer gala da súa condición de “cidade da música” co concerto que a Orquestra Sinfónica de Galicia ofrecerá mañá, 10 de outubro, no Auditorio Municipal. A prestixiosa formación actuará ás 20.30 horas para inaugurar a nova temporada da Sociedade Filarmónica de Vilagarcía, un evento que a Concellería de Cultura patrocina co obxecto de facilitar o acceso do público á música clásica. Grazas a isto, 350 persoas poderán asistir de balde ao espectáculo. Os billetes retiraranse no Auditorio antes do inicio da actuación e entregaranse por rigorosa orde de chegada. Os socios da SFV teñen entrada gratuíta e non precisan de invitación.
09.10.2024.- A OSG regresa a Vilagarcía cun concerto dedicado a Ludwig van Beethoven. O programa a interpretar pola prestixiosa formación inclúe dúas obras para piano e orquestra do gran compositor alemán. Por iso, para a ocasión, actuará como director o pianista español Javier Perianes, que tamén se sentará ao fronte do teclado.
PROGRAMA
L. van Beethoven- Concerto para piano e orquestra en Do maior Allegro con brio Largo Rondo. Allegro scherzando
L. van Beethoven- Concerto para piano e orquestra en do menor op 37 Allegro con brio Largo Rondo. Allegro - Presto