MEDIO AMBIENTE
Parques e Xardíns comeza a tala de árbores no parque de Celso Emilio Ferreiro diante da súa perigosidade A concellería de Medioambiente, que dirixe Diego García, decidiu hoxe, á vista dos resultados da periódica inspección que a firma Arbogal realizada dos parques e xardíns da cidade, non demorar máis a tala dos exemplares de chopos que dominan a imaxe do parque Celso Emilio Ferreiro, ao pé do río do Con. A necesidade da tala xa fora ditaminada polos técnicos da Estación Fitosanitaria do Areeiro hai algo máis de tres anos.
17.10.2024. Entón, con vixilancia continua e algúns tratamentos de conservación conseguiuse manter en pé a maioría das árbores, pero o paso do tempo e os efectos dos recentes temporais levaron hoxe aos técnicos de Arbogal a non demorar máis o que Areeiro recomendara en febreiro de 2021. As probas co resistógrafo foron determinantes: hoxe mesmo puido comprobarse como algúns pes están ocos e moitas estruturadas danadas, ademais dunha presenza notable de colonias de fungos. Nos vindeiros días é probable que se baixen outros seis ou sete exemplares e, segundo como evolucionen as análises que realizan dende Arbogal, a tala podería estenderse a algún máis.
A intención da concellería é aproveitar os meses de inverno para sanear o solo, eliminando a presenza de fungos e outros patóxenos, de xeito que en primavera xa se poidan plantar as novas árbores, que necesariamente terán que ser máis compatibles co terreo onde terán medrar, máis resistentes e probablemente con menos porte. Hai tres anos, por exemplo, os salgueiros "choróns" tan ligados a estampa desta zona do río do Con foron substituídos por freixos.