VILAGARCIA DE AROUSA

CULTURA
Chévere convida a reflexionar sobre a in-comunicación en "Hellen Keller, a muller marabilla?", este sábado, no auditorio
O auditorio municipal de Vilagarcía acollerá este sábado, día 23, ás 20:00 horas, unha das propostas máis arriscadas co grupo Chévere, un dos grandes referentes das artes escénicas en Galicia e Premio Nacional de Teatro 2014. Trátase da obra "Heller Keller, a muller marabilla?", na que, partindo da historia real dunha cidadá americana famosa por ser a primeira muller xordo-cega que obtivo un título universitario, propón unha reflexión sobre a in-comunicación entre persoas oíntes e non oíntes. Chévere explora as posibilidades de compartir unha conversa aberta no escenario, como unha silenciosa reivindicación da importancia das linguas minorizadas, do seu uso público e do seu encontro. De aí que o grupo integre na mesma obra a lingua falada en galego e a lingua de signos.

20.11.2024. O fío condutor da obra é unha muller, Helen Keller, nada en Alabama, que en 1904 convértese nunha celebridade mundial ao ser, segundo as fontes oficiais, a primeira persoa xordo-cega en obter un título universitario en Harvard, despois dun duro proceso de aprendizaxe desde os oito anos. Polo menos esta é a parte da súa vida que fica na memoria colectiva, como un exemplo de superación da discapacidade. Sen embargo, Heller tivo outras facetas que foron sistematicamente silenciadas, ata o punto de que recentemente houbo unha campaña en internet na súa contra. E aí é onde Chévere fai a súa propia reflexión: "Por que se oculta parte da súa vida? A quen lle interesa facelo? Por que queren eliminala da historia? Porque é unha muller, xorda e cega? Porque non se acepta que unha das persoas máis famosas do século XX en EE.UU. sexa comunista? Porque unha muller con discapacidade non se pode converter nunha líder anticapitalista?".

Asistir á representación de Chévere ten un prezo de 5€. As entradas poden adquirirse a través de ataquilla.com (máis gastos de xestión) ou no mesmo día da función, dende dúas horas antes, na billeiteira do auditorio. Como é habitual, as persoas desempregadas, as maiores de 65 e as que posúen o carné xove teñen un prezo bonificado de tan só 3 euros.