Vilagarcía ten unha longa tradición comercial. Na cidade pode atoparse unha gran variedade de establecementos, de tal xeito que é o principal centro de compras da Ría de Arousa. Na actualidade, dende a Asociación de Comerciantes Zona Aberta estase a traballar, coa colaboración do Concello, no desenvolvemento dun Centro Comercial Urbano, que reforzará aínda máis a condición de referente comercial da comarca.

Do mesmo xeito, Vilagarcía conta cunha fonda tradición turística. Nos últimos anos, actuacións como o reacondicionamento da praia da Concha-Compostela, o paseo marítimo, a peonalización de rúas e prazas, ou a creación de novos espacios verdes, contribuíron á recuperación da puxanza que o sector turístico tivo noutras épocas. De feito, creáronse novos hoteis e a hostalería local levou a cabo unha importante renovación. Pola súa banda, a iniciativa municipal tivo o seu referendo na concesión da Bandeira Azul da UE á praia da Concha-Compostela e a Bandeira Verde ó desenvolvemento sostible e o coidado do medio ambiente. Hoxe, informes oficiais recoñecen que Vilagarcía é o segundo municipio turístico do Salnés, despois de Sanxenxo.