|
A compañía de música, danza e animación de rúa de Nelson Quinteiro protagonizará o espectáculo previo á Toma das Uvas, o vindeiro martes, día 31, a partir das 11 da mañá. Ademais dun pasacalles dende as 10 polas principais rúas da cidade para animar ao público a desprazarse á praza de Ravella, será nesta onde a compañía fará unha performance sobre a danza do sol, con reminiscencias celtas, para despedir ao 2023 e dar a benvida ao 2024. Precedida por unha batucada, os danzantes, con teas douradas que simularán os raios solares, ao redor dun sol xigante central, representarán o ciclo diario do sol, dende o amencer ata o solpor, acompañado de música celta. Ao final, invitarase aos asistentes a unirse á danza para crear unha gran roda humana arredor do lume ou Círculo de Luz. |
