Aproveitate de ser mozo, se queres acceder a un montón de servicios, cultura, transportes, aloxamentos, actividades, lecer, etc. Só tes que poñer nas túas mans algún dos carnés para xoves que promoven diversas institucións e que poderás tramitar dende a túa Concellería de Xuventude.

Carné Xove

A un prezo máis axeitado ó teu peto, durante os próximos dous anos (2003-2005) en España e en moitos países europeos, co Carné Xove obterás moitas vantaxes.

¿Que necesitas?
Ter entre 12 e 25 anos (ámbolos dous inclusive), cubri-lo impreso de solicitude, aportar unha foto tamaño carné e unha fotocopia do teu DNI e pagar previamente 6€. Podes usalo en Galicia naqueles establecementos e servicios que figuran na Guía do Carné Xove EURO< 26, guía que se entrega de balde co carné, e no resto das comunidades autónomas, Ceuta e Melilla tamén, así como nunha morea de países europeos. Todos estes enderezos atoparalos na guía.

¿Que servicios che ofrece?
Polo feito de face-lo carné tes un seguro de asistencia en viaxes, poderás participar en tódolos sorteos que se fagan dende a Dirección Xeral de Xuventude, e terás unha gran cantidade de vantaxes nunha multitude de servicios.

¿Onde podes obter máis información?
Nas webs www.rix.org e www.euro26.org.

Outros carnés

Ademais do Carné Xove, que podes tramitar na nosa OMIX, ofrecémosche información de como poder obter outros carnés que ofrecen moitas vantaxes, coma descontos en albergues, viaxes, cursos, etc, e son:
• Carné Máis: ten os mesmos beneficios co carné xove pero é para mozos/as que teñan entre 26 e 30 anos.
• Carné Alberguista Mozo, Adulto, Grupo e Familiar: ofrécente descontos na de Albergues de Galicia e resto de España.
• Carné alberguista para Estranxeiros (completo e por cupón).
• Carné Teacher (ITIC).
• Carné Internacional Xove (IYTC).
• Carné Student (ISIC).